Naake a tia ni Mate (#10403)

Am bwai te mimitong te Uea ae Atuau! Tai kamangora teuare Ko a tia ni karietaata ni mwaakan Inaomatam n tautaeka ae akea tokina, ao tai kamwaawa ni kararoaa mai Iroum teuare Ko a tia ni karinna n te umwanrianna n Am aki tootoki. Atuau, Ko na kanga ni karenakoa teuare ngaia are Ko a tia ni kanuua n Rikiam n Uea, ao Ko na kangaa, Maamaten nanou, ni katannakoa mai Iroum teuare Ko a bon tia n riiriki bwa ana tabo ni kamauri? Ko na kangaa ni karinanoa teuare ngaia are Ko a tia ni tabekiarake ke ni mwaninga taekan teuare ngaia are ko a tia ni karikia ni konaa n Uringko?
Te kamimitongaki, moan te kamimitongaki Ngkoe! Ngkoe bon Ngaia are E Uea man te aki tootoki n te karikibwai ae e bwanin ao Oin Waakina, ao Ko a bon tiku n aki tootoki bwa te Uea irouia bwaai ni kabane ake a karikaki ao te Tia baairei aroia. Ko kamimitongaki, Atuau! Ngkana Ko katoka Am ataataiaomata nakoia Am toro antai, ngkanne, ae e na kaota te ataataiaomata nakoiia; ao ngkana Ko rawa ni kamaiuia ake ko tangiriia, antai riki ae e konaa ni kamaiuiia?
Ko kamimitongaki, ao te kamimitongaki ae akea baaireana Ngkoe! Ko bon neboaki i nanon Am motiraoi ao i Bukim ti bane ni koaua, ni kaotioti. Ko bon taatangiraki ni koaua, i nanon Am raoiroi. Akea riki te Atua bwa ti Ngkoe, te Buoka n te Nibwa ni Mate, te Maiu i bon Irouna.

-Bahá'u'lláh
-----------------------

Naake a tia ni Mate (#10402)

Te Tataro i Bukin te Taunimate
*Te tataro ibukin te mate e kakabonganaaki ibukiia kaain te Baha’i ake e a tia ni koro 15 aia ririki. “Ti aio te tataro ni Baha’i ae e kabaebae are e ananaaki n te bwanin; e na anaaki iroun temanna te tia onimaki ao nikabane ake a roko a na tei. Akea baaireakina bwa e na kaitaraaki te Qiblih n anaaki te tataro aio.” 

*A Synopsis & Codification of the Kitáb-i-Aqdás

O Atuau!  Aio am toro ao natin Am toro are e a tia ni Kakoauako ma Am kanikina, ao ni kaineta moana Nakoim, ni kamwawaaki n tabwaninna man bwaai nako ma ti Ngkoe. Bon Ngkoe, ni koaua, te kabanea n ataataiaomata mai buakoia naake a kaota te ataataiaomata.
Ngkoe Are E kakabwarai bureia aomata ao E kakarabai aia kaairua, baairea taekana n ai aron botaun karawan Am tituaraoi ao marawan Am raoiroi. Kariaia rinna i nanon Oon Am ataataiaomata ae e riao are iai i mwaain bouakinan te aba ao karawa. Bon akea te Atua bwa ti Ngkoe, te Kaakabwarai bure, te Kabanea n Tituaraoi.
*[Ngkanne e na atongaki onoua te tai te taeka ni kamauri ae “Alláh’u’Abhá”, ao a na manga atongaki kaka tebwimaruaiua (19) te tai kiibu aika a koreaki i nano n tatabeua nako.]
Ni koaua, ti bon bane n taromauria Te Atua.
Ni koaua, ti bon bane ni katorobubua i matan Te Atua
Ni koaua, ti bon bane nikabanei nanora ibukin Te Atua.
Ni koaua, ti bon bane n anga te nebonebo nakon Te Atua.
Ni koaua, ti bon bane n takaarua ni katituaraoi nakon Te Atua.
Ni koaua, ti bon bane ni kaantaninga iroun Te Atua.
*[Ngkana te mate te aine, ke e na atonga: Aio Am tabonibai te aine aio ao te nati te aine ae natin Am tabonibai te aine, etc…]

-Bahá'u'lláh
-----------------------

Naake a tia ni Mate (#10404)

Atuau!  Ngkoe ae te Tia Kabwarai buure, te Tia Tituaraoi, ao te Tia Kabebetei naano.
I a bubutii Nakoim ma te nanorinano bwa Ko na kabwarai bureia naake a tia ni mate rabwataia, ao tamneia a waerake nakon te maiu are akea tokina.
Te Uea, kaitiakiia man taian bure, katoki raraomaia ao onea te ro ane irouia nakon te oota.  Kariniia ni barongan te kukurei, kaitiakiia n te ran are moanibaan te itiaki, ao katauia bwa a na noora Mimitongim ike e moa n te Rietaata.

-`Abdu'l-Bahá
-----------------------

Naake a tia ni Mate (#13708)

O Ngkoe te Atua ae kakabwarabure! Kabwarai ana bure nako tinau ae tatangira, nanoangaia n ana kairua nako, anganna Am taratara ae e akoi man niniwana, ao buokia karekea rinna n Am Abanuea. O te Atua! Man moan bongin maiu e kareireiai ao e tararuaai, e ngae n anne I bon aki kona ni kaboi mwin korakaina ma ana mwakuri korakora. Kaniwanganna n anganna te maiu ae akea tokina ao karikia bwa e na karietaaki n Am Abanuea. Ni koaua, Ngkoe te Tia Kabwarabure, te Tituaraoi, ao te Akoi.

-`Abdu'l-Bahá
-----------------------

Naake a tia ni Mate (#16137)

O Atuau, O te Tia Kabwarai buure ao te Tia Kamaunai Karawawata! O Ngkoe are Ko kabwarai buure ao Ko nanoanga! I tabeki baiu ma te kamangori Nakoim, ma rannimatau aika a waanako ni bubuti nakon oon Am Oioi n tamnei bwa Ko na kabwarai ana bure, rinanon Am nanoanga ao Am kakabwarabure, Am tabonibaiteaine are e a tia n rierake nakon kaintekatekan te koaua. Karikia, O te Uea, bwa e na kanuuaki n nangin Am akoi ao Am nanonaki, kateboa neiei inanon marawan Am kakabwarabure ao Am nanoanga, ao karika neiei bwa e na rinnako inanon te tabo ae e tabu, Am bwaretaiti ni Karawa.
Ngkoe, ni koaua, te Mwaaka, te Nanoanga, te Tituaraoi, te Kabwaraibuure.

-`Abdu'l-Bahá
-----------------------

